Вазирлик ҳақида Ҳужжатлар Муассасалар Янгиликлар Тадбирлар Лойиҳалар АКТ Оnline хизматлар

СОҒЛИҚНИ САҚЛАШ ВАЗИРИ ТАЖОВУЗГА УЧРАГАН ТЕЗ ТИББИЙ ЁРДАМ ХОДИМИ ҲОЛИДАН ХАБАР ОЛИБ, БОШ ПРОКУРОРГА МУРОЖААТ ҚИЛДИ Бош сахифа

03 октября 2019

СОҒЛИҚНИ САҚЛАШ ВАЗИРИ ТАЖОВУЗГА УЧРАГАН ТЕЗ ТИББИЙ ЁРДАМ ХОДИМИ ҲОЛИДАН ХАБАР ОЛИБ, БОШ ПРОКУРОРГА МУРОЖААТ ҚИЛДИ

Аввал хабар қилганимиздек, ижтимоий тармоқларда Тошкент шаҳридаги 6-подстанциянинг тез тиббий ёрдам ходими Жаҳонгир Хўжаевнинг ўзига нисбатан бемор яқинлари томонидан тажовуз қилингани ҳақидаги мурожаати эълон қилинган эди. Унда тиббиёт ходими беморнинг қариндошлари томонидан ҳақоратланиб, унга жароҳат етказилгани қайд этилади.

Соғлиқни сақлаш вазири Алишер Шадманов айни пайтда 7-клиник шифохонада даволанаётган Жаҳонгир Хўжаев ҳолидан хабар олди, унинг соғлиғи билан қизиқди. Республиканинг етакчи мутахассислари билан консилиум ўтказиб, Ж.Хўжаевнинг соғайиб кетиши учун лозим бўлган барча чора-тадбирларни кўриш юзасидан топшириқлар берди. Ва шу куннинг ўзида Ж.Хўжаевга ихтисослаштирилган тиббий ёрдам кўрсатиш мақсадида пойтахтимиздаги 7-клиник шифохонадан Республика Шошилинч тиббий ёрдам илмий марказига даволаниш учун кўчирилди.

Вазир, шунингдек, ўз ҳузур-ҳаловатидан кечиб, ўзгаларга шифо бахш этаётган, инсонлар дардига дармон бўлаётган шифокорларнинг ҳақ-ҳуқуқларини қатъий ҳимоя қилиш учун алоҳида ҳуқуқий ҳужжат қабул қилиш вақти аллақачон келганини, елкасига улкан масъулиятни олиб, инсон саломатлиги йўлида туну-кун хизмат қилаётган касб эгаларига нисбатан бўлаётган салбий муносабатларни ўзгартириш зарурлигига эътибор қаратди. Энг муҳими, ҳар бир тиббиёт ходими меҳнат фаолияти, ҳақ-ҳуқуқи вазирлик ҳимоясида эканини таъкидлади. Шунинг учун ҳам Соғлиқни сақлаш вазири Алишер Шадманов шифокорларга тажовуз килиш каби иллатни олдини олишнинг энг самарали йўлларидан бири сифатида тиббиёт ходимига нисбатан содир этилаётган ҳар бир ноқонуний хатти-ҳаракатлар учун қатъий жавобгарликни кучайтириш баробарида уни назоратга олиш кераклиги бўйича шу йилнинг 2 октябрида Ўзбекистон Республикаси Бош прокуратурасига мурожаат килди.

Ўз навбатида Жаҳонгир Хўжаев тиббиёт ходимлари обрўсини юксалтириш йўлида ҳамиша ўз хиссасини қўшишини қатъий билдириб ўтди.

Соғлиқни сақлаш вазирлиги

Жамоатчилик билан алоқалар бўлими.